PNS — NILINAW ng bida sa Juanita Banana na si Bianca Manalo ang isyu na diumano’y insecure siya sa pagpasok sa ABS-CBN ng kapwa beauty queen na si Venus Raj. Hindi rin daw niya alam kung bakit may ganu’ng isyu.
“Friends kami ni Venus. Wala kaming problema. Pareho kaming produkto ng Binibining Pilipinas kaya naloloka ako sa sinasabi ng iba na may isyu sa amin ni Venus,” katwiran ni Bianca.
Hindi rin daw totoong insecure siya sa pagpasok sa Kapamilya network ni Venus.
“Wala namang ganu’n. Bakit naman ako mai-insecure. Hindi naman kami naglalabanan dito. Nagta-trabaho lang naman kami pareho. Sana huwag na nila kaming intrigahin, kasi wala talagang isyu,” pagdidiin pa ng dating Bb. Pilipinas-Universe.
SAMANTALA, huling dalawang linggo na lang ng Juanita Banana sa ere at hindi maitago ni Bianca ang lungkot at saya sa nalalapit nitong pagtatapos.
“Hindi po ako makapaniwala na ’eto na nga po, patapos na ang Juanita Banana. Ang dami-dami ko po talagang natututunan dito mula sa direktor ko hanggang sa mga nakasama kong artista.
“Malungkot na masaya ang pakiramdam ko dahil nairaos namin nang mahusay ang show pero mami-miss ko nang sobra ang mga taping days namin,” pahayag ni Bianca.
Sa Juanita Banana nahasa ang talento sa pagpapa-tawa ni Bianca kaya naman masasabing may puwesto na rin ang dalaga sa mundo ng komedya. Pagkatapos ng Juanita Banana, may mga nakaabang na agad na proyekto para kay Bianca.
Sa ilalim ng direksyon nina Jeffrey Jeturian at Mervyn Brondial, nabusog nga ng masarap na kuwento ng serye ang mga Kapamilya viewers.
Sa nalalapit na pagtatapos nito, mas sasarap pa at mas tatamis ang takbo ng istorya. Sa huling dalawang linggo ng panghapong serye, haharapin ni Juanita ang mga pagsubok sa loob at labas ng punso.
Makakatuluyan kaya nito si Rikitik (Matt Evans) at tuluyan nang magiging prisesa nito? O magiging sila pa rin ni Joaquin (Rodjun Cruz) at mananatiling Reyna ng Maruya?
Kasama rin nga pala sa Juanita Banana sina Dulce, Lito Pimentel, Katya Santos, Isay Alvarez at marami pang iba.
Ang sweet finale ng Juanita Banana ay mapapanood Lunes hanggang Biyernes pagkatapos ng Malparida sa ABS-CBN.