PNS — Kung gaano ang pagkagulat namin sa pagla-lambast na ginawa ni Cristine Reyes kay Sarah Geronimo sa kanyang Twitter account na Pilyang Sweet, napalitan naman ito ng paghanga nang mag-apologize siya sa kanyang Twitter account pa rin last Sunday.
“Sa mga nasaktan, sa mga nadamay na tao pasensiya na po, naging emotional & impulsive po ako. sana maunawaan niyo po. Maging peaceful na sana ang pasko nating lahat. Sana wala na po manggatong at pagdasal niyo na lang po na maayos namin. Kami lang po ang dapat mag-ayos nito. kami lang po,” ang nilalaman ng tweet ni Cristine.
Hinahangaan namin ang young actress sa pag-amin sa kamalian at siyempre, ’pag ganito namang humihingi na ng dispensa ang isang tao, we see no reason para hindi ito tanggapin ng mga taong kanyang nasaktan, partikular na ni Sarah.
Although may kasabihang “the damage has been done,” still hindi naman siguro maituturing na krimen ang ginawa ni Cristine at deserving pa rin namang patawarin ang aktres.
Samantala, sa The Buzz last Sunday, nagsalita na rin si Rayver Cruz na siyang puno’t dulo ng gusot nina Cristine at Sarah.
In fairness kay Rayver, nagpakalalaki naman siya na akuin ang kasalanan sa nangyaring gulo.
Inamin niya na siya ang nagbalita kay Cristine tungkol sa sinabi ni Sarah sa ASAP XV rehearsal na ang magagaling sumayaw ay habulin ng mga seksing babae.
“I take full responsibility for everything kasi nga alam ko naman na tama ang ginawa ko. Naging honest lang ako sa girlfriend ko and lahat naman ng bagay bago ko ginagawa, pinag-iisipan kong mabuti,” pahayag ni Rayver sa The Buzz sa panayam kay Boy Abunda.
Inamin din ng young actor na totoong minahal niya si Sarah, pero dahil nirerespeto raw niya ang mga magulang ng aktres-singer at ang desisyon nilang hindi pa puwedeng makipagrelasyon ang kanilang anak ay siya na raw ang kusang lumayo.
“Pero napakasuwerte ng taong mamahalin niya at magmamahal sa kanya pagdating ng tamang panahon, kasi po napakabuting tao talaga ni Sarah.
“Pero sa kabila ng lahat, napakasuwerte ko pa rin po ngayon kasi alam kong may taong nagmamahal sa akin nang sobra at may taong mahal ko nang sobra-sobra,” say pa ni Rayver na, obviously, ang tinutukoy ay si Cristine.
Ayon pa sa young actor, hindi niya sinaktan si Sarah nang time na na-link sila.
“Pinalaki ako ng magulang ko, lalung-lalo na ng tatay ko, na huwag gumawa ng kamalian o kasalanan sa isang tao kaya wala akong anumang intensyong makasakit o makasama ng loob sa kapuwa nating tao, lalung-lalo na kay Sarah,” seryosong sabi ni Rayver.
Sa bandang huli, hiningan siya ng mensahe for Sarah at heto ang pahayag ng batang aktor: “Kailanman, wala akong intensyon na saktan ka at sa kabila ng sinasabi ng lahat ng tao, sana ako ’yung paniwalaan mo na nirerespeto talaga kita.”